Duront la jamna cumpacta vegn buc mo empriu vocabulari e grammatica: ils giuvenils discuoran, s’entaupan e fan experientschas communablas ordeifer la stanza da scola. A Glion vegnan entscheviders ed avanzai confruntai cun la historia digl Ursin – per ils ins ina regurdientscha d’affonza, per ils auters ina premiera. La motivaziun ei gronda, il progress sperts ed ils motivs per emprender romontsch aschi differents sco las persunas sezzas. La jamna cumpacta ei denton mo ina part dalla purschida «Rumantsch a distanza». Actualmein emprendan 97 giuvnas e giuvens romontsch sin quella via – duas lecziuns ad jamna, per regla avon il monitur. Per ina jamna s’entaup’uss ina part dad ellas ed els buca digitalmein, mobein directamein. (fmr/ptm)

Foto el teaser: Patricia Tschuor-Marques