La nova ediziun «Buorra chi roudla» da l’autura vadaisa Sabine Dormond raquinta d’in bloc grisch e trist, nua che vivan bain blera glieud, ma quella strusch discurra ina cun l’autra. In bel di vegn a star en la terza auzada ina dunna eleganta e cun in pitschen gest metta ella en moviment tut: la dama porta enavos ad ina mattatscha la giacca ch’ella ha pers. La mattina sa legra uschè fitg ch’ella fa senza ponderar bler in cumpliment ad ina vischina. Quella buna tempra è in pau sco ina botta da naiv che rodla e crescha e per finir datti schizunt ina festina en il corridor dal bloc. L’istorgia cumprova ch’i dovra mo pauc per vivifitgar la cuminanza.
Ultra da questa nova publicaziun pon ins retrair da l’OSL era numerusas istorgias d’advent paschaivlas e divertentas per tut la famiglia. En il carnet puter «Il squigliattin e’ l San Niculo» sa gida Son Niclà cun il pitschen stgilat che sa dasda da mez enviern ed ha fom e fraid, entant che l’istorgia sursilvana «Jonas ed il tgaun» metta en il center l’amur commuventanta per in chaun dal mat Jonas che ha nov onns. Auters raquints d’advent sco «Ed a che serv eu?» en vallader e «Polly gida la tatta» dad Astrid Lindgren en rumantsch grischun èn ulteriuras perlas da nossas lecturas da Nadal.
Vus pudais cumprar las istorgias da Nadal rumantschas tant en la butia d’internet da la chasa editura sut www.sjw.ch sco er en tut las librarias.