In’iniziativa dal pievel duai far fin cun il rumantsch grischun en scola, e quai 19 onns suenter che la lingua da scrittira rumantscha è vegnida introducida en scola a Trin. Lantschà l’iniziativa ha Fabio Caprez da Trin. Aifer in’emna ha el rimnà la mitad da las suttascripziuns necessarias. Per che l’iniziativa saja valaivla dovri 112 suttascripziuns. Tenor Fabio Caprez duai l’iniziativa vegnir inoltrada enfin la fin da december a la vischnanca. In dals motivs centrals per l’iniziativa saja la ferma colliaziun che las abitantas ed ils abitants da Trin hajan cun la Surselva. Quai sa mussia cunzunt en il temp liber, di Fabio Caprez. Trin è stà ina da las 23 vischnancas grischunas che avevan decidì da sa participar a la fasa da pionier l’onn da scola 2007/2008 da l’alfabetisaziun dal rumantsch grischun. (rtr/fmr)